Òjcze nasz. Kaszëbsczé spiéwë a mòdlëtwë

Z leżnotë pielgrzimczi Kaszëbów do Rzimù (15-24 X 2004 r.) pòkôza sã ksążka przërëchtowónô przez Eugeniusza Prëczkòwsczégò (ë téż T. Hoppe, E. Prëczkòwską i A. Gòlińsczégò). Je to wespół mòdlewnik ë spiéwnik. Na zôczątkù je tekst napisóny przez przédnika ZK-P i biskùpa pelplińsczégò („Kaszubi Ojcu Świętemu”). Je téż informacëjô ò kaszëbsczëch mszach, ZK-P, ò pielgrzimcë ë ks. bp Dominikù (wszëtkò pò pòlskù). W nym dzélu są téż wëjimczi z homilëjów Òjca Swiãtégò (Gdiniô 1987, Sopòtë 1999) w dolmaczenkù na kaszëbsczi. W pòstãpnym dzélu są mòdlëtwë, mszô swiãtô (ùkłôd), litanie ë Swiãti Różańc, Droga Krziżewô, spiéwë kòscelné ë różné (wszëtkò pò kaszëbskù). Mòżna le sã dzëwòwac, że w jednym môlu są Droga Krziżewô ë „Tata i kòza”. Ale wierã taką ùdbã miôł ùsôdzca. Na nen ôrt mómë dokôzk dlô tëch, co są do gòdzynków ë kòzlinków. Zôs lëchò sã stało, że jakno kaszëbsczi himn nazwóny je tekst H. Derdowsczégò („Tam dze Wisła òd Krakòwa…”). Kò tegò jesz nicht nie ùsejmòwôł!