Kristina Mùza

[Krystyna Muza]

(ùr. 1952)

Ùrodzëła sã 31 zélnika 1952 r. w Starzënie (pùcczi pòwiôt). W 1968 r. skùńcza Spòdleczną Szkòłã w Wiôldżi Wsë, a w 1972 r. Ekònomiczné Liceùm w Żukòwie. W tim samim rokù zaczãła sztudérowac pòlonistikã na Gduńsczim Ùniwersytece. Titel magistra dosta w 1977 r. za dokôz napisóny ò żëcym ë ùtwórstwie J. Rómpsczégò. W latach 1979-85 robiła jakno szkólnô òd pòlsczégò jãzëka w spòdleczny szkòle w Wiôldżi Wsë, a w cządze 1985-2000 w Zespole Szkół Rolniczych w Kłaninie.

M. zadebiutowa w 1973 r. w cządnikù Pomerania dwùma kaszëbsczima wiérztama ë jedną pòlską (ji pòeticczé dokôzë ùkôzywałë sã w nym cządnikù do pòczątkù 80. lat). W 1976 r. dobëła trzecy plac w lëteracczim kònkùrsu òrganizowónym bez Kaszëbskò-Pòmòrsczé Zrzeszenié, a w 1978 r. pierszi. W 1981 r. wëda zbiérk wiérztów Mamota. Jak do terô je òn ji jedurną na nen ôrt pùblikacją.

Pòeticzné dokôzë M. są w ksążce T. Lipsczégò Remusowi króm. Wypisy z literatury kaszubskiej (1990), a téż w antologii J. Sampa Poezja rodnej mowy (1985).