Jón Drzéżdżón (1937-1992)
Ùrodzył sã w Domatowie (pùcczi kréz) w rodzënie kòwala. Do spòdlëczny szkòłë chòdzył w Domatowie, Lesnienie ë Starzënie. Skùńcził Licëją Szkólnëch we Wejrowie (1955) ë zaczął robic we szkòle. W latach 1960-65 sztudérowôł pòlonistikã we Gduńskù, jegò madżistersczi dokôz béł ò J. Piepce. W 1970. dostól titel dochtora za dokôz ò kaszëbsczi midzëwòjnowi lëteraturze. Béł adiunktã na Wëższi Szkòle Szkólnëch (dzys Pòmòrskô Akademijô Szkólnëch) we Słëpskù, pùzni ùczałi na Gduńsczim Ùniwersytece. Rok robił w Zjednónëch Krajach Americzi ë Kanadze na sztipendiji (1973/74). Zajimôł sã Kaszëbama z Òntario. W 1978. rokù na dosebny sztipendiji béł w Norwedżiji. Òd 1976. nôleżnik Zrzeszë Pòlsczich Lëteratów.
Òd 1965. rokù pùblëkùje artikle namienioné kaszëbsczi lëteraturze. Mô wëdóné dwie ksążczi z lëteracczi kriticzi tikający kaszëbsczi lëteraturë: Wędrówki Remusowe po Kaszubach (Gdańsk 1971) ë Piętno Smętka (Gdańsk 1973) ë historiją kaszëbsczi lëteraturë 20. st. (Współczesna literatura kaszubska 1945-1980, Gdańsk 1986).
Òd 1972. pùblëkùje w cządnikù Pomerania prozã ë wiérztë, w 1974. we zsziwkù Gryf òstało wëdrëkòwóné czile jegò wiérztów. Jakno kaszëbsczi pòéta miôł swój ksążkòwi debùt w 1974. rokù tomikã wiérztów Sklaniané pôcorë (1974). Mô wëdóné pùzni jesz zbiérk Przëszlë do mie (1995).
Mô se za prozajika ë na tim gònie drëkòwôł równo pò pòlskù ë pò kaszëbskù. Do jegò dokazów przënôlegają zbiérczi òpòwiôdaniów: W niedzelny wieczór (1974), Dzwónnik (1979), Na niwach (1991), Kòl Biélawë (1991), pòwiesc: Twôrz Smãtka (1993). Pò pòlskù mô wëdóné: Upiory (1975), Oczy diabła (1976), Leśna Dąbrowa (1977), Okrucieństwo czasu (1977), Wieczość i miłość (1977), Rozkosze miłości (1981, Karamoro (1983), Miasto automatów (1984), Twarz Boga (1984), Twarz lodowca (1987), Złoty pałacyk (1990), Czerwony Dwór (1992), Szary człowiek (1993).
Béł tołmaczony na jãzëk włosczi ë rusczi. Dostôł wiele nôdgrodów, m.jn.: mn. Wilhelma Macha (1975), mn. Stanisława Piętaka (1976), 2. nôdgrodã w kònkùrsu wëdowiznë Ludowa Spółdzielnia Wydawnicza (1977). Pierszi, donądka niepùblëkòwóny dokôz Michał Drzymała albo tragedia narodowa (1970) dostôł główną nôdgrodã na Òglowòpòlsczim Lëteracczim Kònkùrsu w Pòznaniu (1970).