Antón Piéper (1917-1985)
Ùrodzył sã w Jastarni-Bòrze w rëbôcczi rodzënie, tam mieszkôł. W 1931. rokù skùńcził hénë spòdlëczną szkòłã. Na skùtk chòroscë ë wòjnë ni mógł cygnąc nôuczi dali. Dopiérzë pò wòjnie eksternisticzno skùńcził strzédną szkòłã. W kùńcu wòjnë béł ewakùòwóny na Rujã, skądka przëjachôł nazôd w czerwińcu 1945. Béł za ùrzãdnika w Ùrzãdze Gminë w Jastarni, we spółdzelni „Samopomoc Chłopska”, jakò referent w miésczim handlu w Pùckù, pùzni we spółdzelni ribny w Jastarni. Òd 1968. robił w Zôrzãdze Pòrtu Hél.
W 1965. rokù òstôł nôleżnikã midzewòjewódzczégò Karna Lëdowëch Pisôrzów (pùzni Stowôra Lëdowëch Ùtwórców). Pisôł wiérztë pò kaszëbskù ë pò pòlskù (lëczbòwò pò równo), artikle, repòrtaże ë pòwiôstczi pò pòlskù. Wikszosc jegò prozë: bôjków, legendów, pòwiôstków, wspòminków, òpòwiôdaniów òstała w rãkòpise. Jegò przedwòjnowé dokôzë nie przedërchałë wòjnë. Debùtowôł w krakòwsczim cządnikù Tempo dnia (1939), pùzni béł drëkòwóny w cządnikach Kaszëbë, Pomerania, Litery, Za wolność i lud. Béł téż drëkòwòny w antolodżijach: Më jesmë òd mòrza (1963), Wybór współczesnej poezcji kaszubskiej (1967), Modra struna (1973). Jegò pòlskòjãzëkòwé wiérztë òstałë wëdrëkòwóné w tomikach: Morze moim domem (1982) ë Opowieści helskie (1985).
Grôł jedną z przédnëch ról w filmie Między dwiema latarniami. Pisôł tekstë gazétnicczé ë pùblëcësticzné do cządników: Dziennik Bałtycki, Za i Przeciw, Rada Narodowa, Nowa Wieś, Poznaj Swój Kraj, Kaszëbë.
Ułożył Paweł Szczypta